( مربعــات مـع الجــن )
قفلت مخي بقفل ورميت ف الهوا المفتاح
لجل يهدي البال واقضي الحياه مرتاح
صابني العما والخرس ونسينا طعم الذل
وعشت جوه الظل حر وحياتي براح
****
خبّط عليا شيطان من فوق وتحت الراس
دخل ف خرم الودن وصبح معاي وسواس
وراح لباب المخ وفضل عليا يزن
وسلط عليا الجن يا تفتح يا اضربك بالفاس
****
ضربت كف ف كف وحلفت الطلاق بيمين
مفتاحي طار ف الهوا طب أسأل عليه مين
هربان أنا من الناس وكرهت صنف البشر
ليه الشيطان اتحشروبالجن اتنصبلي كمين
****
طلباتك ياعم الجن ايه عندي ليك حيفيدك
لا ابني ينفع ابنك ولا حفيدي يبقي حفيدك
انت من سلالة الجن واحنا من البني آدمين
وانت م الخادمين للنبي سليمان سيدك
****
الجن بص لفوق وطلب بسرعه الريح
ولقيت بساط الريح عليه كوام مفاتيح
وفتحلي قفل المخ ونام كمان جواه
واشتكالي من بلواه اتاريه من المجاريح
****
ولقيته صاحب هم وشايل هموم الجن
ومراته صاحبة امر ولا يوم عليه بتحن
وحتي ف غوايةالبشر مسيطر عليه الخال
ولماضاق عليه الحال جاي ف راسي يِكِن
****
حط إيده في إيدي وأخدني وسكنا الجبل
ونسّيتو شغل الشيطنه ونسّاني حتي الهبل
عشنا و كمان شفنا الجن والشيطان حيران
معذور بقي الإنسان لو المخ معاه اتخبل
...................
بقلم المستشار / عبد الرسول كريم يس
ليست هناك تعليقات:
إرسال تعليق