غاوي فلسفة بقلم /مرقص اقلاديوس

من يومي غاوي فلسفة
(حكاية ايقاعية بالمحكية المصرية)
بقلم..مرقص إقلاديوس
..........
دايما دايما بيسألوني عن الأماني.
قالوا لي ...يا ترى حبيت و لا عشت العمر وحداني.
قلت لهم..حبيت معنى ياما كتبت عنه.
لكن هاكتب لكم عنه من تاني.
....
حبيت إنسان يعيش من غير صراع مع الغير.
يا أخي... ده ربنا بيرزق الطير.
حبيت إنسان يحب الفرح,
ما يبقاش هوا لحبايبه سبب جرح.
حبيت إنسان يرجع طيب زي ما ربنا خلقه.
و خلق له خلايق ياما ..لأنه أحبه.
حبيت إنسان ينسي.
ما ينساش جمايل اللي حبوه عليه,
إنما ينسي يقسى.
حبيت إنسان ما لوش اطماع.
يفتكر إن ابونا آدم لما بص للشجرة ضاع.
حبيت إنسان ما يبقاش حسود.
أصل اساسا ما يليقش بيه
يحسد أخيه على دنيا فانية و هوا مخلوق للخلود.
.....
 و بعدين حبيت أكون أنا الإنسان اللي باتكلم عليه.
لكن اكتشفت إن اللي باحلم بيه يظهر ما ينفعش.
لقيت نفسي غريب وسط بشر بعضهم ما بيرحمش.
ده حتى الكلام عن حلمي مع كتير منهم طلع ما يليقش
....
لكن لسه بأحاول و ياريت إنتم كمان تحاولوا,
و أملي في ربنا كبير كبير اوي.
إللي  بيدي القدرة للي ما يقدرش.
       ملاح بحور الحكمة..مرقص إقلاديوس