بحب الشتا
**********
بحب الشتا
و بحب برده
وافتكر ذكرياتي
وأبويا يجيب القصعة
ويعمل راقية نار تدفيني
ويحط الخشب وقوالحه
وكفوفنا علي وش النار
وحلة العدس أبو جبة
نغرق فيها ونقلبها هزار
**************
بحب الشتا
وبحب هدوءه
وافتكر ذكرياتي
واقف في البلكونة
وألبس زعبوطي
وأدخل وسط الأوضة
وأحكيلهم حكاياتي
أمنا الغولة
وأبو رجل مسلوخة
ويشدوا في كتفي أحفادي
**************
بحب الشتا
وبحب ألعابه
وافتكر ذكرياتي
لما أجري تحت المطرة
وأغني يا مطرة
رخي رخي
يقولولي فين الأغاني دية
ويفطسوا من الضحك عيالي
أقولهم البركة في المحمول
وزمن توهان العقول
***************
بحب الشتا
والدنيا عايمة
وافتكر ذكرياتي
لما كنت أشمر رجلي
وأبلبط في الطينة
وأزروط في هدومي
وأمي تغسلها وهي فرحانة
وتقولي هملصلك ودانك
أخر شقاوة يا بسيوني
****************
بحب الشتا
وبحب زعابيبه
في شهر أمشير
وافتكر ذكرياتي
والعفرة تعمي عينيه
زي العسل علي قلبي
ووقت الضهرية
أنام وشخر وتشخيري
ولا أجمل سيمفونية
واخد كفايتي من نومي
*****************
بحب الشتا
وأيام الشتا
وافتكر ذكرياتي
لما كنت في الجيش
وكانت أيام تدريبي
دفعة عشرة
في شهر عشرة
عسكري بطل مايهمنيش
من برد الشتا ياعزيزي
وأقف خدمه زي الديدبان
برنجي وكنجي وشنجي
عيني يمين وشمال
وأزعق بصوتي
ها ها مين هناك
والهوي يضرب في قفايا
والحركة تدفيني
**************
كلمات بسيوني صديق
ليست هناك تعليقات:
إرسال تعليق