وصفة سهلة
بقلم ..مرقص اقلاديوس.
.........
صرخت كتير
و تعبت من الصياح.
و طول عمر ى
و لسة بأقول
بأن بعد الليل الطويل صباح.
و بعدين ابتديت
اتكلم عن الكلام
أو بمعنى اصح من الصحاح.
ازاى يبقى الكلام كلام..
قلت
أسكت بأه كفاية.
و بعدين لقيت
انى بدل ما اسكت
اتكلم عن السكوت.
السكوت أنواع
فيه اللى بيسكت من حبه.
لما يقابل حبيبه
يتخرس لسانه.
و يزيد و يرتفع
صوت دقات قلبه.
و فيه
اللى بيسكت من كسوفه.
لما يبقى عامل عملة
و نفسه الجبال تغطيه
عشان ما حدش يشوفه.
و فيه اللى بيسكت استسلام
عشان
مافيش فى إيده حاجة
و كلامه لا هيجيب حق
و لا هيرفع ظلم
و لا هيوٓصل لحاجة.
لكن
احسن اللى بيسكتوا
اللى بيسٓكت عقله.
و يخللى دقات قلبه.
تتناغم مع
دقات قلوب كل الكائنات.
طير و شجر.
بشر و حجر.
قلوب كل الخلق
تسبح سوا
اللى خلق الخلق.
ملاح فى بحور الحكمة
مرقص اقلاديوس
ليست هناك تعليقات:
إرسال تعليق